आईसीसी एकदिवसीय विश्व कप क्रिकेटमा आज दुई वटा खेल हुँदैछन् । आजको पहिलो खेलमा अस्ट्रेलिया र बङ्लादेश पुणेमा नेपाली समयअनुसार बिहान पौने ११ बजे खेल्दैछन् ।
अस्ट्रेलिया यसअघि नै सेमिफाइनलमा पुगिसकेको छ । उसले सेमिफाइनलमा दक्षिण अफ्रिकासँग खेल्ने निश्चित भएको छ । यो खेलको नतिजाले अस्ट्रेलियालाई कुनै फरक पर्नेछैन । तर बङ्लादेशका लागि सन् २०२५ को च्याम्पियन्स ट्रफीमा छनाेट हुन यो खेलमा जित आवश्यक छ । बङ्लादेश आठौँ स्थानमा छ ।
आज हुने अर्को खेलमा दिउँसो सवा दुई बजे पाकिस्तान र इङ्ल्यान्ड खेल्दैछन् । यो खेल इडेन गार्डेनमा हुनेछ । पाकिस्तानलाई सेमिफाइनलमा पुग्न ठूलो अन्तरको जितकाे आवश्यक छ । अङ्कतालिकामा सातौँ स्थानमा रहेको इङ्ल्यान्ड सेमिफाइनल होडबाट बाहिरिसकेको छ ।
आजको खेल हारे पनि च्याम्पियन्स ट्रफी खेल्ने सम्भावना छ । विश्व कप क्रिकेटमा समूह चरणको अन्तिम खेलमा भोलि घरेलु टोली भारत र नेदरल्यान्डस् खेल्नेछन् ।
हेड टू हेड
विश्वकपमा दुवै टोली ४ पटक आमनेसामने भएका छन् । अस्ट्रेलियाले ३ खेल जितेको थियो भने २०१५ को विश्वकपमा एक खेल रद्द भएको थियो।
यी दुई टोलीले सन् १९९९, २००७ र २०१९ को विश्वकपमा प्रतिस्पर्धा गरेका थिए । बंगलादेश विश्वकपमा अस्ट्रेलियाविरुद्ध जितको पर्खाइमा छ ।
बंगलादेशका लागि यो प्रतियोगिता राम्रो भएन । टोलीले ८ खेलमध्ये ६ खेलमा हार बेहोरेको छ । तर अन्तिम खेलमा श्रीलंकालाई पराजित गर्दै च्याम्पियन्स ट्रफीमा छनोट हुने आशा जीवितै राखेको छ । विश्वकप अंक तालिकाको शीर्ष ८ मा पर्न सक्ने टोलीले सन् २०२५ को च्याम्पियन्स ट्रफीका लागि छनोट हुनेछन्।
बंगलादेशले आज कप्तान शकिब अल हसन बिना खेल्नेछ । साकिब औँलाको चोटका कारण बाहिर छन्, उनको अनुपस्थितिमा नजमुल हुसेन शान्तोले टोलीको जिम्मेवारी सम्हाल्नेछन्। बलिङको जिम्मेवारी शोरिफुल इस्लाम र मेहदी हसन मिराजले लिनुपर्नेछ । युवा तान्जिम हसन शकिबले श्रीलङ्का विरुद्ध तीन विकेट लिए, तर आफ्नो १० ओभरमा ८ को इकोनोमी सहित ८० रन दिए।
अस्ट्रेलियालाई प्रयोग गर्ने अवसर
ग्लेन म्याक्सवेलले खेलेको शानदार इनिङ्सपछि प्याट कमिन्सको कप्तानीमा रहेको टोली सेमिफाइनलमा पुगेको छ । दुवैले मिलेर अस्ट्रेलियालाई ७ विकेटको क्षतिमा ९१ रनको नाजुक अवस्थाबाट उकासेर अफगानिस्तानले दिएको २९२ रनको लक्ष्य पुरा गरेका थिए ।
ओपनर डेभिड वार्नर आठ इनिङ्समा ४ सय ४६ रन बनाएर टोलीका लागि सर्वाधिक रन बनाउने खेलाडी बनेका छन् । योसँगै नम्बर ६ ब्याट्सम्यान ग्लेन म्याक्सवेलले ३९७ रन बनाएका छन्, जसमा विश्वकपको सबैभन्दा छिटो शतक र दोहोरो शतक पनि समावेश छ ।
अस्ट्रेलियाको बलिङ युनिट उत्कृष्ट छ । फास्ट बलिङमा मिचेल स्टार्क, जोस हेजलउड र प्याट कमिन्सले कुल ३० विकेट लिएका छन् भने स्पिनर एडम जाम्पाले २० विकेट लिएका छन् । म्याक्सवेललाई आज टिममा आराम दिएर सिन एबोटलाई मौका दिन सकिन्छ ।
मौसम अवस्था
वर्षाले अस्ट्रेलिया र बंगलादेशको खेलमा बाधा पुर्याउने छैन। तापमान २६ देखि ३२ डिग्री सेल्सियसको बिचमा हुनेछ र प्रशंसकहरूले कुनै अवरोध बिना खेल पूरा हुने आशा गर्न सक्छन्।
पिच रिपोर्ट
पुणेको एमसीए स्टेडियममा ब्याट्सम्यानका लागि सहज हुनेछ । टस जित्ने टोलीले बलिङ रोज्न मन पराउनेछ। पछिल्लो पाँच खेलमा यहाँको पहिलो इनिङ्सको औसत स्कोर ३०४ रन रहेको छ ।
