बझाङ: बझाङको सदरमुकाम चैनपुरमा छाडा पशुचौपाया बढेका छन् । विहानतिर सेती नदीको छालमा र बेलुका चैनपुर बजारको चौराहादेखि खुल्ला मञ्चसम्म र शान्ति मार्ग रोडको पान्कोटसम्म राति सडकमा छाडा पशुचौपायाहरु बढ्न थालेपछि छाडा पशुचौपायाले गर्दा यातायातका साधनहरु जाम हुनुका साथै पैदल हिड्ने यात्रुलाई पनि समस्या हुने गरेको छ ।
छाडा पशुचौपायाकै कारण सदरमुकाम चैनपुरमा दुर्घटनाको जोखिम पनि बढेको छ । रातिमात्रै होइन,विहान अवेरसम्म पनी यातायातका साधनहरु बजार क्षेत्रमा आउदा बाटो नछाड्ने, बीच सडकमा बस्ने गरेकाले दुर्घटना बढ्न सक्ने स्थानीयहरु बताउँछन् । नगरपालिकाले पनि छाडा पशुचौपाया नियन्त्रणका लागि कुनै पहल नगरेको समेत स्थानीयको आरोप छ । साँघुरो चैनपुर बजारमा जिल्लाका ग्रामीण क्षेत्रबाट लुकिछिपी बूढा र रोगी गाईगोरू छोड्ने चलन बढेपछि बजार क्षेत्रमा देखिने पशुचौपायका कारण सवारी जाम र दुर्घटनाको जोखिम बढेको हो । सडकमा पशुचौपायाको संख्या ह्वात्तै बढेपनि दीर्घकालीन व्यवस्थापनका लागि कुनैपनि निकायले ध्यान दिन नसक्दा छाडा पशुचौपाया चुनौतीको रूपमा देखिएका छन् ।
सवारी साधनको चापका कारण पैदल यात्रुलाई आवतजावतमा समस्या भइरहेको अवस्थामा जयपृथ्वी नगरपालिकाको डुग्री, गोलाइ, भोपुर र सिमखेत लगायतका क्षेत्रबाट छाडाचौपाया भित्रिन थालेपछि दुर्घटनाका साथै तरकारी तथा फलफूल व्यवसायीलाई समेत असर गरेको चैनपुर बजारबासीहरु बताउँछन् ।
दिनभरि बजारका चोक,गल्ली–गल्लीमा देखिने छाडा चौपाया साँझ परेपछि चैनपुर बजारको चौराहादेखि खुल्ला मञ्चसम्म र शान्ति मार्ग रोडको पान्कोट रोडमा बस्ने गरेका खप्तडछान्ना गाउँपालिका घर भइ हाल चैनपुर बजारमा व्यवसाय गर्दै आएका दिनेश खड्काले बताए । उनले नगरपालिका र वडास्तरबाटै चौपायाको व्यवस्थापनका लागि प्रयास गर्नुपर्ने बताए ।
यता जयपृथ्वी नगरपालिकाका मेयर चेतराज बजालले भने यो विषयमा आफु जानकार भएकाले छाडा चौपाया व्यवस्थापनकोलागि छिटै बैठक बोलाएर समस्याको समाधान गरीने बताए । कार्यव्यस्तताका कारण यो विषयमा तत्काल पहल थाल्न नपाएको र छाडा चौपाया व्यवस्थापन चुनौतीपूर्ण भए पनि केहि दिनमै पहल थाल्ने नगर प्रमुख बजालको भनाइ छ ।
