बझाङ : जिल्ला अस्पताल बझाङले आकस्मीक बाहेकका सबै सेवा बन्द गरेको छ । मंगलबार एकै दिन २६ जनामा कोरोना संक्रमण पुष्टि भएपछि जिल्ला अस्पताल बझाङले आकस्मिक बाहेकका अरु सबै सेवा बन्द गरेको हो ।
अस्पतालबाट प्रवाह हुने स्वास्थ्य सेवालाई सामान्य रुपमा संचालन गर्दा कोरोना संक्रमणको जोखिम बढन सक्ने अवस्थालाई मध्य नजर गर्दै आकस्मीक बाहेकका सबै सेवा गरिएको अस्पतालका निमित्त प्रमुख डा. मिलन खडकाले बताए ।
अहिले जिल्लामा संक्रमितमध्ये ३९ जना आइसोलेसनमा उपचाररत रहेको र उच्च जोखिममा रहेको अस्पतालमा उपचारका लागि आउने बिरामी र स्वास्थ्यकर्मी दुवै जोखिममा पर्ने भएकाले आकस्मिक उपचार बाहेकका अरु सबै उपचार सेवा बन्द गरिएको उनको भनाई छ ।
दुई सातायता लक्षणसहितका ३ सय ९० जनाको पीसीआर परीक्षण गर्दा ८३ जनामा कोरोना पुष्टि भएको छ। मंगलबार मात्र बझाङमा एकैदिन २६ जनामा कोरोना भाइरसको संक्रमण पुष्टि भएको थियो ।
परीक्षणको दायरा बढाए संक्रमितको संख्या पनि उल्लेख्य बढ्ने स्वास्थ्य कार्यालयका कोभिड सम्पर्क व्यक्ति नारायण जोशीले बताए। संक्रमितको संख्या बढे संगै परीक्षणको दायरा बढाउनकै लागि स्थानीय तह मिलेर सञ्चालनमा ल्याएको पीसीआर प्रयोगशाला पनि संचालनमा ल्याउने तयारी भईरहेको उनको भनाई छ। सोमबार मात्रै जिल्लाका सबै स्थानीय तहले एक-एक लाख रुपैयाँका दरले रकम दिने निर्णय गरेपछि पीसीआर प्रयोगशाला सञ्चालन आएको छ ।
हेल्थ डेस्कमा खटिन मान्दैनन् स्वास्थ्यकर्मी
जिल्ला प्रवेशस्थल वित्थडमा हेल्थ डेस्क स्थापना हुन नसक्दा परीक्षण नगरि मानिसहरू बझाङ प्रवेश गरिरहेका छन्। जिल्ला बाहिरबाट जिल्ला भित्रने मानिसहरु सोझै घर गएर परिवार र समुदायको सम्पर्कमा पुग्ने भएकाले बझाङ कोरोना संक्रमणको उच्च जोखिममा पर्न थालेको हो ।
जिल्लामा कोरोनाको संक्रमण बढ्दै गएपछि स्थानीय तहहरूले जिल्लाको प्रवेशद्धारा वित्थडमा हेल्थ डेस्क राख्न खोजे पनि स्वास्थ्यकर्मिहरु जान मानिरहेका छैनन । महामारीको बेला जोखिमको अग्रपंक्तिमा प्रत्यक्ष खटिएका स्वास्थ्यकर्मीहरुले सअघिको जोखिम भत्ता समेत नपाएको र जोखिम भत्ताको सुनिश्चितता नभएको भन्दै स्वास्थ्यकर्मीले हेल्थ डेस्कमा खटिन नमानेका हुन । स्वास्थ्यकर्मीलाई जोखिम भत्ता नदिएकाले खट्न नमानेका जिल्ला अस्पतालका निमित्त प्रमुख डा. मिलन खड्काले बताए।
