दसैँका बेला चङ्गा उडाएर रमाइलो गर्ने जमात हिजोआज बझाङमा देखिँदैन । दसैँको चहलपहल सुरु भएदेखि घरपरिवार, आफन्त, साथीभाइ जम्मा भएर आकाशमा चङ्गा उडाएर मनोरञ्जन गर्ने चलन अहिले हराउँदै गएको छ ।
विभिन्न रङरोगनले सिँगारिएका बस्ती, बाटो, घर वरपर सरसफाइले सुन्दर बनेका गाउँबाट आकाशमा चङ्गा उडाउँदा दसैँको रमझम बढाउने गरेको जयपृथ्वी नगरपालिका ३ का दिलबहादुर खड्का बताउनुहुन्छ । पहिलेका वर्षहरुमा आफूले पडेशको जिउलोबाट चङ्गा उडाएर रमाउने गरेको उहाँ सम्झनुहुन्छ ।
विगतका वर्षहरुमा पडेश, गोलाई, भोपुर, चैनपुरमा चङ्गा उडाएको दृश्य देखिने गरेको तर अहिले यो चलन हराएर मानिसहरु जुवातास र मोबाइल ग्याममा आकर्षित भएको जयपृथ्वी नगरपालिका ४ वडाध्यक्ष इश्वर खातीले बताउनुभयो । पुराना चलनहरु मानिसका स्वास्थ्यका लागि फाइदाजनक भए पनि अहिलेका चलनमा विकृति थपिदै गएको भन्दै खातीले चिन्ता व्यक्त गर्नुभयो ।
खुला आकाशमा चङ्गा उडाउँदा वातावरण नै सुन्दर बन्थ्यो । नयाँ पुस्तामाझ दसैँमा चङगा उडाउने संस्कृतिबारे जानकारी नै छैन । पुरानो संस्कृतिलाई अनुशरण गर्दै हिजोआज भने केही विद्यालयमा तल्ला कक्षामा पढ्ने साना–साना बालबालिकालाई दसैँका बेला चङ्गा बनाएर देखाउन थालिएको छ ।
खुला आकाशमा चङ्गा उड्दा गाउँमा निकै रमाइलो उत्साह छाउँथ्यो । मनोरञ्जन मात्रै नभई परिवारमा खुसुी, साथीभाइबीचको सम्बन्ध प्रगाढ बनाउने गरेको पत्रकार रमेश केसी बताउनुहुन्छ । हिजोआज बढ्दो सूचना प्रविधिको विकासले आकाशमा प्रतिस्पर्धात्मक रुपमा चङ्गा उडाएर मनोरञ्जन लिने चलन कतै देखिँदैन । यस्ता पुराना संस्कृति लोप हुन पुगेका छन् ।
