बझाङ: नेकपा एमालेको चितवनमा हुने १० औँ महाधिवेशनका लागि जिल्लाबाट महाधिवेशन प्रतिनिधि छनोटको कार्य भइरहेको छ । सुदुरपश्चिम प्रदेशका ९ वटै जिल्लामा महाधिवेशन प्रतिनिधिका लागी सांसद देखि उपमेयरसम्म दौडमा छन । विभाजनको असर अझैपर्न सक्ने देखिएपछि नेकपा एमाले ले सबै जिल्लाहरुमा प्रतिनिधि छनौट गर्दा सकेसम्म सर्बसम्मत ढंगले गर्न भनेको छ । बझाङ र बैतडीमा महाधिवेशन प्रतिनिधि सर्वसम्मतले चयन भएका छन । अन्य जिल्लाहरुमा पनि सर्वसम्मतले प्रतिनिधि चयनका लागी प्रयास भईरहेको एमालेले जनाएको छ । तर, आकांक्षी धेरै देखिएका स्थानहरुमा सहमति जुट्न नसक्दा चुनावको माहोल बनेको छ ।
एक मात्र संघिय निर्वाचन क्षेत्र रहेको बैतडी र बझाङमा शनिवार सहमतिमै प्रतिनिधि छनौट टुङगाएको छ । महाधिवेसनका लागी बझाङमा १६ जना प्रतिनिधि छनौट भएका छन । संघिय सांसद आशाकुमारी बिक, अनेरास्ववियुका पुर्व अध्यक्ष ऐन महर, एमालेका जिल्ला अध्यक्ष दमन भण्डारी, समन्वय प्रमुख खडक खडका सहित १६ जना स्थानिय तहका प्रमुख उपप्रमुखहरु महाधिवेसन प्रतिनिधि छनौट भएका छन । यस्तै बैतडीमा १० वटै प्रतिनिधित्व हुने गरी सर्बसम्मत रुपमा १५ जना प्रतिनिधिको टुंगो लागेको छ । संघीय सांसद दामोदर भण्डारी, प्रदेश सभा सांसद लिलाधर भट्ट, जिल्ला अध्यक्ष सुरेन्द्र पाल सहित १५ जना छनौट भएका छन । दार्चुलामा तीन दिन देखि सहमतिमै प्रतिनिधि छनौटको प्रयास भएपनि अझै टुङगो लागेको छैन । त्यस्तै डोटी, डडेल्धुरा, अछाम, बाजुरा, कैलालीमा पनि सहमतिमै टुङगाउने प्रयास भईरहेको सके सम्म आजै साँझ टुङगो लाग्ने नेकपा एमालेका सुदुरपश्चिम प्रदेश सचिव राजेन्द्र रावलले बताए ।
अरु ठाँउमा सहमति भएपनि कञ्चनपुरको क्षेत्र नं. १ मा चुनाव भईरहेको छ । महाधिवेशन प्रतिनिधि छनोटमा सहमति जुट्न नसक्दा निर्वाचन प्रकृया थालिएको हो । ५ जना महाधिवेशन प्रतिनिधि छनोटका लागि १० जनाका बीचमा प्रतिस्पर्धा हुँदैछ । खुलातर्फ ४ जना प्रतिनिधिका लागि जिल्ला अध्यक्ष बीरबहादुर थापा ‘पातल’, सहसचिव पल्लवराज भट्ट, रोशन खड्का, हिरासिंह विष्ट, खेम सुवेदी, रामचन्द्र नेपाल, भक्तबहादुर अधिकारी, खेमराज ओझा, महिलातर्फ बेलौरी नगरपालिकाकी उपमेयर चित्रादेवी चौधरी र भूमि सम्बन्धी समस्या समाधान आयोग कञ्चनपुरकी पूर्व अध्यक्ष कमला बोहरा, चुनावी मैदानका उत्रिएका छन ।
निर्वाचन क्षेत्र नं. २ मा आज पनि सहमतिको प्रयास जारी छ । ५ जना महाधिवेशन प्रतिनिधिका लागि १५ जनाको उम्मेदवारी परेको छ । खुल्लातर्फ १३ जनाको र महिलातर्फ २ जनाको उम्मेदवारी परेको छ । प्रतिनिधिका लागि संघीय सांसद नरबहादुर धामी, पूर्व सांसद कृपाराम राना, बेदकोट नगरपालिकाका मेयर अशोककुमार चन्द, जिल्ला सहसचिव रणबहादुर महरा, युवा संघ नेपालका निवर्तमान अध्यक्ष बचनबहादुर सिंह र जिल्ला उपाध्यक्ष लक्ष्मी बुढालगायत १५ जना प्रतिस्पर्धामा उत्रिएका छन् । क्षेत्र नं. ३ मा भने सर्वसम्मत ढंगले महाधिवेशन प्रतिनिधिको छनोट गरेको छ । आईतबार विहान लामो समयको प्रयास पछि १२ जना आकांक्षि बाट संघीय सांसद दिपकप्रकाश भट्ट, भीमदत्त नगरपालिकाका मेयर सुरेन्द्र विष्ट, सुदूरपश्चिम प्रदेश कमिटी सदस्य कृष्णदेव पन्त र जिल्ला कमिटी सल्लाहकार खिमा चन्दलाई महाधिवेशन प्रतिनिधि छनोट गरेको छ ।
